સ્વચ્છ અને સલામત પાણી પીવાની ટેવો પાડીએ.

પાણીને સ્વચ્છ અને સલામત રાખીએ, માટલાં ઘસીને અંદર-બહારથી સાફ કરીએ, પાણી ઢાંકેલું રાખીએ અને માટલામાંથી વાપરવાનું પાણી લેવા ડોયા કે નળનો ઉપયોગ કરીએ અને હા, પીવા માટેનું પાણી સ્વચ્છ ગરણાથી ગાળીને ભરીએ.

પાણીમાં રહેલા સૂક્ષ્મ જીવાણુઓને દૂર કરવા પાણીને ઉકાળીને કે ક્લોરિનની દવા નાખીને પીએ.

ખોરાક પણ તાજો અને ઢાંકેલો હોય તો જ ખાઈએ. વાસી કે બજારુ ખુલ્લો ખોરાક ખાઈએ નહીં. માખીથી બચવા ખોરાક ઢાંકેલો રાખીએ, ફળ અને શાકભાજી સ્વચ્છ પાણીથી ધોઈને વાપરીએ.

દરરોજ સ્નાન કરીએ, કપડાં સ્વચ્છ પહેરીએ અને માથાના વાળ સ્વચ્છ તથા ઓળેલા રાખીએ. આંગળીઓના નખ કાપેલા રાખીએ.

જમતાં પહેલાં, સંડાસ ગયા પછી અને રસોઈ કરતાં પહેલાં હાથ ધોવાની ટેવ પાડીએ.

ખુલ્લામાં મળત્યાગ કરવાનું ટાળીએ, શૌચાલયનો ઉપયોગ કરીએ. જો ખુલ્લામાં જવું જ પડે તો રહેણાક વિસ્તાર અને પાણીના સ્રોતથી દૂર જઈએ અને મળ ઉપર માટી ઢાંકી દઈએ.

ઘર તથા આંગણું અને આજુબાજુની જગ્યા સ્વચ્છ રાખીએ.

વપરાશના ગંદા પાણીને ગમે ત્યાં ન ફેંકીએ. ઝાડ-છોડને રેડીએ, શોષખાડામાં નાખીએ અથવા નીક વાટે દૂર લઈ જઈએ.

ઘરનો કચરો પણ ગમે ત્યાં ન ફેંકીએ પણ ખાડામાં દાટીએ કે ઉકરડામાં નાખીએ.

કૂવા, તળાવ, હેન્ડપંપની આજુબાજુ ગંદકી ન કરીએ. સંડાસ કે ઉકરડા આવાં સ્થળોથી દૂર રાખીએ.

મચ્છરોથી બચવા, પાણીનાં ખાબોચિયાં દૂર કરીએ, ટાંકીનું પાણી ઢાંકેલું રાખીએ, ઘર સ્વચ્છ રાખીએ અને સંધ્યાકાળે બારીબારણાં બંધ રાખીએ (આ સમયે બહારથી મચ્છરો ઘરમાં આવે છે), મચ્છરદાની કે ધૂપ-બત્તીનો ઉપયોગ કરીએ.